Awi! Ka lalṭhian. Chap- 10

AWI! KA LALṬHIAN- 10

Damdawi in kan thlen chuan an lo buaipui nghal sawk sawk a. Engmah hlauhthawnawm a awm loh thu min hrilh chuan kan thaw huai hlawm mai. A rawn harh hun chiah kan nghak ta. "Nui hetianga titu hi i hria em?" Hriatpuia chuan a rawn ti a. Ka lu ka lo thing a. "Hre lo, hria ilang chuan" sawi zawm loin ka ngawi daih. "Ka hrethiam e. Hetianga titu hi chhuichhuak ang cheu, FIR theh luh a ṭul a ni" a ti a. Keipawh ka bu ve nghat. "Nia eng a pawh chu ni se, amah Ruthi hi lo harh phawt rawh se" Hlutei chuan a rawn ti ve a. Hriatpuia pawh a bu ve nghut. Khawngaihtea chuan a darah a rawn kuah a. "Lungngai suh bro, a harh leh em em ang" a ti sup a. Hriatpuia erawh chuan chhang lo in pawnlam a pan ta a. Kan en zui vung vung ringawt. 

"Hmeichhia a ngaihsak ve awmchhun hi a pawi ngawt mai" Muantea chuan a ti sup a. "Nia, keichu Mimii hi anih ka ring tlat" Tetei chuan a rawn ti a. "Maw? Eng nge Mimii a inrawlh ve ngawt chhan tur?" ka lo ti hû thung. Min chhandan tur a hre leh bik si lo chu a dar a kan uk ringawt. Bethsyi chu lo chhuakin "Alo harh tawh" a rawn ti a. Kan lut nghal. Kimtea chu Hriatpuia kalna lamah khan a kal thung. "Ruthi i ṭha tiraw?" ka ti vat a. "Ka haw duh" a lo ti sap thung.

"No i haw thei lo" Sawmtei chuan a lo ti a. "Engvangin?" Ruthi chuan a lo ti a. "Eng a pawh chu ni se. Hostel-ah let phawt ang u" ka ti a. Anni paw'n anlo pawm ve thliam mai. Chhuah kan tum lai takin Hriatpuia a rawn lut ve a. Ruthi khum bulah chuan a ding run a. Ruthi pawh chuan mak ti takin a lo en ve ha a. "Vawikhat mah khatiang thil kha tihtum leh tawh reng reng suh" ti hlukin a chhuak leh daih. Kan inmelh hrek hrek hlawm a. Kan nui ta ngawt. 

Hostel kan pan hnu chuan Ruthi room-ah kan lut nghal a. Khumah chuan kan muttir a. Kan ṭhianho leh Remsanga te an awm ve bawk sia. "Lo va chhuak teh u" ka ti a. An chhuak ve mai. Kan ṭhianho chauhin kan awm ta a. "Ruthi eng thil nge thleng?Engtin nge hotel-ah khan i awm theih?" Sawmtei chuan a ti táwng a. Ruthi chuan a chil a lem khawlh. "Ih nia,nizan zan tir khan ka room lehlam chiah ami Jenny hian min rawn call a, thingtlang aṭanga kal ve tho ania. Chuan min lo hruai teh a rawn tia, hotel address kha min pe bawk a. Ka va thlen chuan 'Haw hmain drinks hi in phawt ang' tiin Coke hi min pe a, keipawh chuan ka in ve mai. Mahse ka awm a nuam lo ta viau mai a, mipa pakhat kha a lo kal a hmel ka hmu chiang thei lo, ka vai riai a. Tha ka nei lo, mahse ka rilru chu a harhfim vek ang lawi a, chuan room-ah khan min luhpui a chuan" tiin a insut nghal hlawp hlawp a. Hlutei chuan a lo kuah leh vat. Kan inrin hmain kawngka chu a rawn intheh hawng ṭhuai a. "Hmela chu a hmel i la hre thei em?" Hriatpuia chuan a rawn ti hràwk a. Ruthi chuan a lu a lo thing a. "Ka hmu phe ruai alawm" ati sap.

Hriatpuia chu a rum nghut a. "Tu pawh ni rawh se, nuam a thai lo khawp ang" a ti leh nghut a. A ṭhiante chuan an rawn kuah hlawm a. "Inbengdai rawh bro" an ti a. Hriatpuia pawh a inbengdai ve deuhin ka hria. Ruthi chu a rawn hawichhuak thut a. "Engtin nge hotel-ah khan ka awm tih inhriat?" a rawn ti ta a. Kan phu zuk hlawmin ka hria. Vid darh vel kha a hre miah lo aniang. "Aa nia ih" Hlutei chuan a ti a. Kawngka pawn aṭang chuan. "I vid darh te kha hre lo awm deuhin awm suh aw" hmeichhe aw hian a rawn ti lang lang a. A ṭhiante ni awm tak nen chuan an nui hak. Hriatpuia chuan va din hnaihin "I ṭawngkam fimkhur rawh" ati nghut a. Mahse Kimtea chuan "Hriat, inbengdai rawh hmeichhia anih kha" a ti a. Hriatpuia chu an kalsawn pui a. Va panhnai ve in. 

"I thusawi kha fimkhur rawh aw" ka ti a. "Eng nge a dik alawm hre lo awm taka han awm vel,mipa mit lak leh khawngaih hlawh duh vang tih hriat reng" tiin thil tenawm tak sawi niawm fahranin a ner sak. A hmui sen ṭha zet chu a petsawi zauh bawk a. A sawizawm leh "Thingtlang nu ho hi chuan pawisa neihna anih dawn phawt chuan tih hreh an nei hleinem" a ti leh a. A bula ding a ṭhiante pathum chu a melh a. An lo nui dar dar.

Ka dawhtheihna hian a tlin leh ta lo. A samah ka kek lawk a, ka phih thlu ṭhuai a rak tuar a. "Zaki i zak chai na nge" ti tuarin min rawn kek ve a. "Hmeli min kek ve ngam elo?" tiin ka sam chu a kek a, a kekna phian lehnghal. A hmaiah chuan ka ham a, a ṭe tuar. Ka sam a kehna pawh chu a thlah chiang viau mai. "Hmeli" tihpahin ka kek a, a sama pawt chuan ka hnuk ta lawm. Ka beng thul, ka thinrim khan khua ka hmu tawh lo a ni ber mai. Ka harh leh meuh chuan ka sawisak nu chu chhuatah a lo let reng a. Thinrim inbengdaih tum zetin ka thaw kàwk kàwk a. "I ṭawng tam mah mah a nih kha, ṭawng tlem leh ngawih lo zir rawh" ka ti a. A ṭhiannu pakhat chuan ka hnung aṭang min rawn vuak a lo tum a. Mahse min vuak hmain Tetein a lo phih lawp. "Hriam thawh te i tum ve khanglang elo?" tiin chhuatah a phih thlu nawk a. An chhir tak tak mai chu.. bengdaih a ngai hial lawm. An ṭhiante pahnih lam chu hawiin. "In ṭhiante pahnih hi buaipui ru" ka ti a. Min melh zak zak chungin an hnuk sawn a. An pawm zo miau lo alawm.

Ruthi room-ah chuan ka lut a, kawngka ka khar nghal hmiah. Ruthi chu ṭah paeh a lo ṭap ṭha thei lo tawh zawk a. "Ka nu ten an hriat hunah engtiang chiahin nge a nat ang le" a ti a. A sawi zawh rualin a phone a rawn ri a. Ka lo ensak vat, "Anu" tia a save a ni. Ka melh zauh a, hlauthawng zetin min lo melh ve. Ka pick ta a. "Bawihte i ṭha em? Eng nge awmzia" a rawn ti nghal a. A hlauthawng hle tih a hriat. "Nu Siam lungngai suh, a ṭha vek. A pawngsual lo ania aw." ka ti a. A nu pawh chu a thaw huaiin ka hria. "Ka lo kal ang" a ti a. "Ni lo e, Nu Siam lungngai suh, kan awm alawm. Ngaihṭha deuh khan lo awm rawh u" ka ti a. Ani pawn lawmthu te sawiin kan dah ta phawt. 

Ruthi lam chu ka melh a "I nu ania, lo kal a tum a, mahse ngaihtuah lo tur che in ka hrilh anih kha" ka ti a. "A hmu ve vek tihna mi? " a ti a. "Aaa.. aniang" ka ti ringawt. A thaw ham ham a. "Ka hah" a ti sap a. Kan chhuahsan rih a, Hlutei chuan a awmpui ta a. Pawnah chuan Remsanga te nen kan inhmu a. "FIR theh luh a ṭha ang em?" Bethsyi chuan a ti a. "A ṭhat ka ring" a lo ti ve bawk. Min chhaih min chhaih a, min chhaih ni daih alawm kan ni pawh a ni chiah lo, ni angin kan awm ve tawp. "Awi keichu chu ai chuan Ruthi sawi hmeichhia kha biak hmasak ka duh ngawt mai" Sawmtei chuan a rawn ti ve a. "Nia zawng ila i dawp tak tak ang u hmiang" ka ti a. Ka melh kual a, an hmelah chuan an phur zia ka hmu thei. 

"Mahse tu nge a hmel pawh kan hre reng reng hleinem" ka tih leh chuan an hnual deuh. "Aww hostel ami midang ho hi kan zawt kual mai dawn lawm amah Ruthi chu zawh chi pawh va ni suh" Tetei chuan a ti hluk a. "Nia lo zawt kual ru, sa kan pel dawn nia" ka ti a. Ka nui sak, anni pawh an khi ve sak mai. "Hmeichhe rapthlak tak inni" Kimtea chuan a ti sup a. A lam chu hawiin Sawmtei chuan "Ṭhiante tan chuan mi rapthlak ber pawh kan ni mai ang chu" a ti a. Kimtea pawh a nui ve tawp. 

Inah kan haw ta hlawm phawt a. Thil thleng vel chu ka nu ka hrilh nghal mawlh mawlh a. A ngawi reng a, engmah a sawo ve lem lo. A tukzingah chuan Sawmtein min lo call a. "Ka hre tawh," a rawn ti a. "Ṭhat chu vawiinah kan zawng dawn nia" ka ti a."Nia ṭha khawp ang, tunah chuan a chhungte inah a awm rih an tia, koh chhuah theih dan chu a awm khawp ang" a ti a. "Ni e, a awlsam ang eng apawh chu ni se Ruthi bulah kal phawt angai. Chuan Hlutei khan a awmpui ta tihna mi?" ka ti leh a."Aih Tetei zawkin" a ti a. "Ok a ṭhat chu amaha awmtir chi pawh a ni hleinem." ka ti a. Kan inbiakna chu kan titawp rih.

Class kal ka tum lo sa tho a. Ka insiam sawk sawk a, hostel lam ka pan nghal hmiah. Hostel kan thlen chuan Ruthi room pan nghal mai kan tum a, mahse hmeichhe pakhat hawi deuh zak zak a, Ruthi room bul chiaha lut chu ka en reng a. "Kha nu kha anih kha" Sawmtei chuan a rawn ti a. Ka bu nghut."Lut phawt ang" ka ti a. Ruthi room-ah chuan kan lut phawt a. Alo muhil a. "Tukverh aṭanga zuan te a tum a. Amah leh amah intihnat a tum a, a inhua a. Aaa... ka sawithiam lo. A pawi tak tak a ni. Hriatpuia ka ko ṭep zawk mawle" a ti a. A nui var var. "Hriatpuia hian a duh ve tak takin ka hria a" a ti leh sep a. "A mut theih lai hian mu se ka tia," tihpahin ani pawh chu a ham bai bai a. "Nang pawh i chau anih kha, mu ve rawh" Bethysi chuan a lo ti a. Tetei pawh chu a chau ve ngang aniang, engmah sawi loin a ku ve nghal. Kan college neitu te hi an hausa bawk a, kan hostel pawh hi a changkang a, a thianghlim viau bawk. Tetei te mu chu Hlutei lo awmpui turin kan ti a. Room lehlamah chuan kan lut ta a. 

Thawm dim thei ang berin kan lut a, rooma luh rukte chu kan tiṭhang tih hriat fahranin tuman thawm kan chhuah lo, a room chhung chu a nuam viau mai. A rimtui chek chek viau e. Mahse a chet duhdan erawh a rimtui ve si lo. Bathroom-ah a awm anih ringin khumah chuan kan lo ṭhu a, a rawn chhuakin min hmuh chuan ala phu zuk zui. "Eng nge in rawn tih dawn?" a ti a. Ding chhuakin "Engmah mawle, kan rawn lut ve mai mai" tiin a thil tarmawi te chu ka enkual a, a sana khuma a dah chu enin "Hetiang leina te hi i nei a, i va han hausa bik tak em aw" tiin sana chu ka la kang a. "Wow i inhmeh viau mai ka ring" tiin ka enkual vel a. "Dah nghal rawh, a neitu phalna tel lo a la i nih kha i hria em?" a rawn ti ṭhawt a. "I va ui si se ve, i leina pawisa pawh a thianghlim chuang hleinem maw aw" ka ti a. Khumah chuan ka theh thla a.

A lam ka hawi chuan mak tizeta meng bial kaw kaw chungin min lo en a. "Eng nge sawi sual ka nei em ni?" nui sâng chungin ka ti a. "Dawtin min puh tum reng reng suh" a ti a. "Ania lawm, tu nge Ruthi ko chhuak tur khan ti che? Pawisa engzat nge a pek che a?" ka ti vin ṭhak. "Eng.. eng... ngee i sawi awmzia? Engmah ka hrethiam lo" a ti bah nak nak a. Ka nui hak. "Pawisa engzat maw a pek che a? Tu nge?" ka ti leh a, ka rin ai ka aw dam. Thinrima ang buan buan chi, rawl ring thei tak ka ni. "Eng pawisa mah min pe lo, Ruthi vid chungchangah khan inhnamhnawihna ka nei lo." a ti ve a, mahse a aw chu a khur deuh. "Kan hria ang chu" ka ti duh lek. Chutah tlanchhuah tumin a che phuta. Ka lo dang vat. Sawmtei chuan a lu-ah eng emawin a rawn vua a. Nikhua a hre ta lo. A khumah chuan pangai deuhin kan mut leh phawt a. Remsanga call ka tum lai chuan Bethsyi chuan Hriatpuia a lo call a. "Hriatpui. Estheri chu kan buaipui tawh, in bolero leh in warehouse kan hawh duh. Chu chu a tawk" a ti nghal mawlh mawlh. A biakdan teh tawp chuan ka nuih a ti za tlat. Remsanga te ṭhianho hi mi hausa leh mi hlun chhungkua aṭanga chhuak vek an ni.

Bethsyi chuan a ngaithla leh vang vang a. "Ok a ṭha vek e" a ti a. Phone chu a dah. "Hriatpuia te huanah kan dawp thei ang chu, mahse mipa tel lo in. Hmeichhia leh hmeichhia kan indawr ang" a ti a. Ka lo bu nghut. Hriatpuia te chu an lo thleng aniang. Kawngka chu an rawn kik a. Ka va hawn chuan Kimtea alo ni. Ka nuih sak a. Rawn lutin Estheri chu a paw nghal nawlh a. A chhukpui nghal. Min lo enzui emaw khatiang kha an awm hran lo. A tam zawk chu class an kal a. Mahrawh chu class kal lo te erawh an room-ah an inkhung bet vel aniang. Bolero hnungah chuan a dah a. "Kan lawm lutuk e, khawo chahbi" tihpahin ka kut ka lek chhuak va a. Engmah sawi loin min pe ve nghal.

An huan lam chu kan pan ta nghal a. Map entur a awm a, kan buai bik lo ang. Hlutei leh Tetein Ruthi chu an lo awmpui a. Keini erawh kan kal vang vang. An huan kan thlen chuan motor chu ka ti ding dawta. Sawmtei leh Bethsyi chu an chhuk a, hnunglam kawngka chu hawngin Estheri chu an kuah chhuak a. Huan enkawltu nu chuan min lo pan vata. Hriatpuian engkim alo hrilh sa nge eng zawhna mah a nei lo. "Min mamawh chuan min lo ko mai dawn nia, Nu Madini ka ni e" a ti a. "Aw le" tiin inchhungah chuan kan kuah lut ta a. Ṭhutna thinga siamah chuan ka ṭhut tir te te a. Hrui kan ken chuan kan phuar ta a. Kan phur nghet viau ang.

Sawmtei chuan tuiin a theh ṭhawt a. A rawn harh ve nghal. Hlauh hmel takin min melh a. "Min chhuah tir rawh u, min kidnapped tiin case ka file thei asin" a ti tuar tuar a. Kan nuih liam mai mai thung. "Kan hriatduh min hrilh phawt chuan i chhuak em em ang" ka ti a. "Eng nge inhriatduh chu? Engmah hriat ka nei ve lo, ka inhnamhnawih ve lo" a ti leh a. "Tu in nge Ruthi kha ko chhuak tura ti che?" Bethsyi chuan a ti a. "Tuman min tir lo, ka kochhuak lo hrim hrim" a ti a. A biang a ri nghal thlawp. Sawmtei chuan a beng na thawkhat aniang,a kamsir a thi ser set thei.

"Dawt sawi tum khanglang lo mai rawh. Sawi rawh" a ti zui ṭhawt a."Ka hre lo" ala ti fan a. A biang a ri leh thlawp. An han zawh ngial pawn engmah a sawi duh lo a. Ka dawhtheihna in a tlin ta lo. "Sawmte tui so kha va la rawh, a vawt a ti nih hi" ka ti a. Sawmtei pawh kalin ketli-in tui so vut vut chu a rawn keng a. "No-ah khan thli chhuak la, kan bual dawn nia" ka ti a. A thli chhuak ve mai. No chu kenga a lu chung aṭanga leih ka tum chuan a ngaingam bik lo aniang."Mimiin, Mimiin ko chhuak a, coke kha in tir turin min hrilh a. Chuan pawisa tamtak min pek a tiam a, ka nu damlohna avangin ka lo pawm ve mai a ni" a ti a. Ka nui hawk. "Sana te i lei kha, i nu damlo enkawlna tur chu a ni lo khawp ang" ka ti a. "Aih ania lawm, a damdawi kan lei zawh hnua bangin ka lei ve mai mai anih kha" "Min ngaidam hram rawh u, khatiang khan an ti ang tih rin ngaihna reng reng ka hre lo" a ti a. "Anih leh mipa kha tu nge?" Bethysin a ti a. "Mimii bialpa anih kha" a ti a. Kan inmelh zawk. Ka rindan chiah a ni.

Mimii chu a chak lo khawp ang.

"Aw le, nangchuan ṭangkaina i nei tawh hran lo ang. Mahse kan tan i hlauhawm thei, kan thil tih hi Mimii i hrilh anih vaih chuan" ka ti a. "Ka hrilh lo ang, ka hrilh lo ang tih ka intiam e. Min ngaihdam theihna anih dawn phawt chuan engpawh ka ti ang" a ti a. Chu erawh a ṭul lo, hmelma ring tur khawpa mawl kan ni bik lo.

(Zanah a awm lo ang aw. Ka ban ana. 😒Edit pawh ka edit lo 🙃)