Awi! ka lalṭhian. Chap - 8

"nubawih khaw nge i awm?"ka nu aw ri ka hiat rualin ka tlan thla vat a. "In lo haw tawh elo? Chaw te chu in eipuar maw?" ka ti a. "Um puar a ni mai, nang chaw i ei tawh em?" a ti a. "Aih, ka eipeih lo" ka ti hmak a, "nga ti maw? Chaw ei peih loh ngawt tur a ni hlei nem, eng chawhmeh nge i siam reng reng a?" tiin choka lamah a kal phei a. " Awi Ramnghinglo eng nge i dal kanah hian i telh a!" a ti a. Ka ngawi reng. A hnu lawkah " awi! I bai siam chu a va al em em" a rawn ti leh a.

Choka ṭang a rawn chhuah chuan " engtin nge chawhmeh hi i siam a?" a ti a. Ka ngawi reng. Ka chawhmeh siam dan kha chu sawi pawh ka sawi peih tawh lo. 

Ka dal kanah aisen ka thlak a, ka bai siam kha chi telh ka tum kha a buakin a rawn bua a. Ka anṭam tlak ah khan ajino ka telh a, atam leh mah mah sia. Chini ka thlak leh a, a tam leh tho sia. Eitlak a awm lo. "Awi ti te chuan tu in ah nge maw i mo ve theih ang lee?" a ti vawng vawng a. Ka ding ngawi kar ringawt, ka chhang peih lo, ka eirawngbawl kha fuh lo viau mahse ka chauh pui ve tho alawm.. 

"Chaw chu i la ei lo em ni?" a ti a. "Um bakah ka ril a tam chuan lo a, a ho lutuk" ka ti zung zung a. Chek tlat tlatin. "Ei rawh ka siamsak ang che" tiin a bag chu dawhkanah a dah a. Choka lamah a lut lehnghal. "nu, a ngai lo. Ka ril a ṭam chuan lo a ho lutuk" ka ti a." Ei rawh, i pumpui a chhiat em kha, chaw ei lohte i tum mai mai" a ti nghat nghat a. Choka ah lutin fridge aṭang chawhmeh siam tur a la chhuak mawlh mawlh a. Tunah dar 8:30 a ri ṭep tawh a. Eirawng kan bawl ṭan dawn chiah a nia. Huiham..

 

" Nubawih i phone a ri in ka hria" tiin ka pa chu an room aṭang a rawn chhuak a, ka harh zawk. " Aw nimaw ka han enchhin nge" tih leh step a lawn chhoh zai zai ka rual a. Ka phone ka en chuan number hlang hi a lo ni a. A lo ring tawp hman a nih hi. Thil pawimawh a nih chuan min rawn call back leh mai ang chu ka ti a. WhatsApp-ah chuan lutin message chu ka en kual a, message pawimawh em em a awm lo ti ila ka ngaihpawh em em a awm lo ka tihna. Kan ṭhianho group chu ka en a. Hlutei chu a lo thinrim nasa mai hi a lo nia.

{Engvang in nge kha pa khan ka mu lai kha min lo thlir ve ringawt a?} a lo ti a. Tetei lah chuan {Amah va zawt la} a lo ti mai si. {Khawi aṭang nge zawt se mi tih a} a rawn ti leh. {Aw.. ka hre bik nang, engtin nge hria se min tih. Amah pawh vawiin ah kan hre chauh a nih kha} Bethsyi chuan a lo ti ve leh a. Mi nghal ho tak hi chu(h). An lo insual lo chauh lawm le.

{Mate a duh hmel vur vur khawp che kha} ka va ti ve a. {Awi awi awi... zak rawh} a rawn ti a. {Awi za thum in ka zak nghal} Ruthi'n a rawn ti ve leh. Ka phone chu en in ka nui khi vur vur reng mai a. {Photz u chaw ka ei dawn} ka ti a. {Ok} an lo ti ve sap sap bawk. Group chu ka out a. Mahse private message pakhat ka number save loh aṭang chuan a rawn thleng a. Ka open a {Nubawih, Hlutei biak pawh theihna tur min pe thei ang em?} a lo ti a. A name ka en chuan ~Khawngaihtea🤪~ tih hian a lo indah a.

{Tu nge? Ka hre ngai che em?}tiin ka reply a. A seen nghal, a type leh nghal a. Mahse min chhanna pawh en hman lo in ka nu min kohna vangin ka chhuk a. Inhnuai ka chhuk chuan chaw ei a lo siam fel tawh a. Dawhkanah a lo chhawp a, a tui hmel hlawm sak sak asin. A rimtui zia chu maw.

Ka ei nghal mawlh mawlh a, ka rilṭam zia ka hre chiah. Ka eipuar peng pawng hnu chuan ka eina thleng chu ka sil a. Ka room lamah ka chho lehnghal. Whatsapp ka luh chiah chuan ka number save loh aṭang khan message a lo tam mai.

{Keimah Khawngaihropuia vawiin ami kha ka nia, Hlutei kha note dil ka duh a} tih te. {Mawhhh sawi ṭha tehhh} {min pe duh dawn lo maw} {min pe la Remsanga phone number ka pe ang che} ka chhiar zawh rualin ka reply a. {Tu nge Remsanga chu?} ka ti a. {Hlutei note chu nga tan nge i tih?} ka ti a. A hnuaiah {ehe! Hlutei hi i duh ni maw🤔} ka va ti a. Ka message lo chang sa ang hrimin a seen rang kher mai. A type nghal a.

{Remsanga chu kha hmanni a i hnung chiaha lo thleng kha nia} a rawn ti a. Euu! Chhe lo te-a kha niang a. A nih chuan ka bem daih ang. {Ka duh maw?}a rawn ti let hû a. {Ava buaithlak e aww} tiin Hlutei number chu ka send a. {Nubawih i va han fel tak em😘} a rawn ti a. {Kal teh} ka lo ti thung. Remchukchu-a tih hi number a rawn send a. {Kha aw Remsanga number chu, i lo va bem dawn nia} a rawn ti! {Ka khaizai dawn che mawn le} ka ti a. {Awi ka hlau emai, i ṭhiannu kan ve daih nge} a ti a. {Ok} ka ti ve a. Group-ah chuan Hlutei message ka lo chang ta ran mai. Ka nui kur kur reng a. Remsanga number chu ka save ta nghal a. Chhe lo te-a tiin ka save a, a dp ka en vanga chiang pawh ka ni. A chhiatloh zia hi chu aw... A bike-a a chuang lai hi a ni a, awi! ka lalṭhian ih e.. ka sawi peih tawh lo. Chhiatlohna zawng zawng neitu tih hian a sawifiah mai thei ang.

Ka rin ang ngeiin Hlutei chuan message a lo thawn a. {Tu nge Khawngaihropuia hi ka number pe} a rawn ti a. Sawmtei chuan {Calm down calm down my dear, sawi chiang la} a rawn ti a. {Hei} tiin thlalak hi a rawn thawn a.

Khawngaiha: Induhnu

Hlutei: Tu nge?

Khawngaiha: Keimah.

Hlutei: Keimah chu tu nge?

Khawngaiha: i bialpa khawngaihtea

Hlutei: bialpa ka nei lo aw

Khawngaiha: tunah khan i nei chiah aw.

Hlutei: kal teh, zak lo lutuk mai

Khawngaiha: Makpa fel tur hi zaklo mi ti ngawt suh😒

Hlutei: makpa fel turte ti.. zahna spelling pawh i hriat ka ring tawh lo.

Khawngaiha: a letling zawng pawn ka spel thiam😌

Hlutei: ka awih lo ber awm e

Khatiang vel kha an inbiak dan chu nia.

{Ehe! Lalhlute bialpa i lo nei elo?min hrilh ve duh lo amaw?ka la na} Sawmtei chuan a rawn ti nghal a. {Aww chhiar chiang ta che mawle😠} Hlutein a rawn ti ve. {Aw le kan chhiar chiang leh nge,chiang kek kawkin} {Aw chhiar rawh} a ti a. Kei erawh ka ṭawng ve duh miah lo.

{En teu, Chhe lo te-a number kha ka nei tawh a, ka va bem dawn mawni le} ka ti a. {Tu nge chhe lo te-a chu?} Hlutein a rawn ti a. {Aw kha kan inrace zana chhe lo deuh kha} ka va ti a. {Ramnghinglo i la ngaihtuah reng elo? Zak ve rawh} a rawn ti a. {Eng nge induhna-ah te chuan..} ka ti a. {Zak rawh} tih bawk. Group aṭang ka out a, private message a lo awm leh tawh. Chhe lo te-a hnen aṭang a la ni zui! Ka au chhuak ṭhelh a ni. Ka seen vat a. {Hi} tih tlawng. Mahse chu ringawt pawh chu ka tan chuan lampui tham a ni.

{Hi} ka ti ve a. Message rawn thleng kha 5mins a ral daih tawh vangin a seen mai pawh ka ring lo. Mahse a rawn seen vat, a type nghal. Ka thin hi a su dup dup maiin ka hria. {I mu tawh em ni?} a rawn ti leh. {Mu a, a hil lo} ka va ti a. {Nghal lutuk} a rawn ti leh a. Ka khi vur vur mai. {Nga ti nge min rawn biak ve tehmial a?} ka ti a. Ka phurna chu thup ka tum hram hram a ni. {Ti mah, zanin i hman ang em?} a rawn ti a. A sawi awmzia ka man lo. {??} tih ka va thawn a. {Race} a rawn ti ringawt a. Mahse ka man tho. {Thei lo ang, ka in race na kha ka ṭhiannu bike a nia} ka ti a. {Ka bike in i race dawn nia} a rawn ti a. Ka duh teuh lo. {Aa ka nu ten an phal lo a} ka ti ngawt a. {Hman zan pawh khan i nu phal lo chung i lo kal kha} a rawn ti! He pa hi, tu nge maw a nih chiah le? Engtin nge a hriat vek theih a?

{I hre ngawt lo} ka ti a. {Ka hria lawm, chuan hmanni zan pawh khan in ṭhiannu Hlutei tih hlim chhuanlamin inrawn kal} a rawn ti! Awi! Hepa hian engkim a hre vek a nih hi. {Eng tin nge i hriat a?} ka ti ta a. {I hriat ve zel ten} a ti duh chauh a nih chu! Kan ṭhianho group ah {mi beng hawisawk lai sticker min lo pe teu} ka va ti a. Bethsyi'n min rawn pe vat. Ka lo save hmiah hmiah a {a tawk thanks e} ka ti a. Remsanga chu ka va thawn ta a. A la rawn nui nasa em em zui. {Muttui phawt aw} a rawn ti a. Pangngai deuhin ka mangṭha ve tho. Mahse ka lam in ka zuang zek zek lo chauh a ni. A tuk zing ka tho te chu ka thawh hlim atang ka khi var var reng mai. Ka nu'n min hmuh chuan "i mumangah eng nge i hmuh a?" a ti a. "Thlahrang" ka lo tih khum a. Ka nu a tum hmak. 🤣

Chaw kan eizawhah ka insiam a, ka insiam zawhah Hlutei te inkawtah ka ding ta a. Lalnunhlui lah chu a hmanhmawh lo lui emaw ni. Nidang zawng zawng aiin a muang. A rawn chhuak "satel speed hian che ṭhin suh" ka ti hlak a. "I zak em? Vawiin ah thawh ka hai alawm" a ti a. "Ve ngei chuan" ka ti a. "Nizanah ka number i pek vangin kan inhnial zankhua ṭep lawm, a nghal ropui si" a ti a. Ka nui put put mai. " A zaidam phian ang" ka lo ti daih thung.

" A zaidam leh dam loh chuan ka thusawi nen inzawmna a nei em ni?" a rawn ti hlak a. " Nei e, in inngaihzawn chuan i thinchhe ve sia, mipa zaidam tak i mamawh alawm" ka ti a. Ka helmet chhanah min beng bu lawp. "chhurbur eng nge maw le" ka ti a. " Ani nena in ngaihzawn te kha chu maw sawi pawh sawi suh, ka pian nawn leh hunah duh leh amah hre ngai miah lo in ka piang ang" a ti tan tan a. " I chhe cute a ti leh tawh ngawt ang che." Min melh rum raps. Ṭawng leh a tum chiah chu, "chuang rawh, kal vat ang kan tlai tawh teh a nia" ka tihchuan ani pawh ṭha takin a rawn chuang ve leh mai.

Kan tlai deuh tawh vangin ka tlan chak a. Hlutei chuan a hlau tih ka hria, mahse engmah a sawi bik lo. College kan thlen chuan kan spot lam kan pan nghal a. Mahse Ruthi te chu an lo awm tawh lo a, min lo nghak peih tawh lo aniang. Park ṭha sawk sawkin classroom lam kan pan a. Mahse corridor ah chuan mi hi an lo awm luih luih a, classroom lam chu an lo en ṭhap bawk. Keini pawh chu kan kal ve nghal a. Classroom chhung kan luh chuan ka ding chawt.

Mimii leh Ruthi te chu an lo indinchilh ran hi a lo ni a. Mimii chuan "ka sawi chuan i ti tih ka chiang, ka bialpa hi lo be ve duh reng reng suh, nang ang te chu e a duh lo lutuk. A lo reply che paw'n beisei lo nei duh suh" tih pahin a kut ṭangin Ruthi chu a nawr sawk sawk a. Ruthi thung chuan "i bialpa kha ka be hmasa lul lo, aman a nih kha min rawn be hmasa. Zawk zamah che hian" tiin ṭhut na lam a pan a. Ka insum hman lo teuh ṭhin. "Eng a? Nang ang thingtlang nula hmeithai fanu lehnghal hi a duh lul lo ang che chuan lo hre rawh.." a sawi zawh hma in a biang a ri ṭhak. Engtik laiin nge a bul ka thlen ka hre lo. Mahse tunah chuan a hma-ah ka ding ran mai si.

"Han sawi leh teh" ka ti hriam hraih a. Rawn hawichhuakin zak map lo a dak vahin "Thingtlang nula hmeithai fanu" a sawi zawh leh hma in ka beng leh sawk a. Ka hnuk thlu a, ṭhut betin ka beng leh siah siah mai. An lo au tuar tuar a. Mahse ka thinrimin khua ka hmu tawh tlat lo. Ban tha chak zetin ka kawngah chuan a rawn man a. "Duhtawk rawh" ti supin min kalsawn pui a. Kan spot hmasa zawk building hnunglamah zawk khan min kalpui a. "I hahdam deuh tawh em?" a ti a. Ka bu nghat.

"Khatiang khan che buan buan zel suh" a ti nghut a. Za lo zetin ka nui hak. "i ṭhianpa kha midangin hmeithai fapa tia sawiin mi zawng zawng hriatah hmusit takin ti ta se engtin nge i tih ang?" tiin ka en a. Min chhang lo. "Min  hriatthiam tak tak dawn si loh chuan sawi mai mai suh" ti hmakin ka tho a. Classroom lam ka pan san ta a.

(🤣A topic ah kan lut ṭep han ti vel ilah😆)