Awi! ka lalṭhian. Chap - 9

Classroom ka thlen chuan ka ṭhiante ṭhut na lam chu ka pan nghal a. "Ruthi i ṭha em?" ka ti a, a bu nghat. "Nangmah zawk kha i ṭha em? khatianga che tur kha i ni lo asin" a ti a. "Ka ṭha lawm, chuan eng nge thil awmzia min han hrilh teh u" tih pahin Sawmtei te lamah chuan mit ko ka san âk a, a thaw hawk.

"Spot-ah kan nghak char char cheu a, mahse inlo thleng thei si lo a. Kan lo va luhsan cheu a chuan kan luh chiah khan Mimii khan Ruthi hi a rawn ankhum ta vak vak a. Chu chu inrawn innang ching kikawi kual vel a nih kha" a ti a. Ruthi lam chu ka hawi leh a. "Ruthi eng nge awmzia? A bialpa nen hian buaina innei ve ziah" Hlutei chuan a lo ti a. "Nia ih a bialpa hian min lo be ṭhin a, pangai deuhin ka chhang ve mai zel a. Mahse min rawn text tak fo ah chuan 'Min rawn be tawh suh, i bialnu khan hria se keimah bak min mawhpuh leh dawn lo' ka tih pawhin a ṭhulh duh chuang lo a. Mahse ka reply tawh ngai lo, tikhan buaina bawk a ni leh ta nih kha" a ti a. Tumah kan ṭawng lo kan ngawi reng. "Ka sawi reng kha, kei min kawm chuan buaina in insiam a ni mai ka tih kha" a ti a, a insut zui hlawp hlawp.

Hlutei chuan kuah vatin "Ruthi khati zawngin ngai suh, khatiang kha kan sawi tum a ni lo nia.. Ṭhiante chu kan inpuihtawn hian kan inṭhianṭhat zia a lang alawm" a ti a. Midang te pawh chuan kan hnem ve a. "Kha nga ti nge a?" rawn ti ri vang chuan kawngka lam chu kan hawiphei a. Kan ṭhutna hi hnunglam kawngka hnaih zawk a nih vangin an ṭawng kha ring hran lo mahse kan bengah a ring viau thung.

"Ngati mah maw le" ka ti hmak a. Khawngaihtea chuan rawn pan pheiin "Hlutei na i nei em ni?" a rawn ti a, lu a lo thing vat. "Nei hran love" a ti a. Ruthi chu a la kuah reng tho. Ruthi chu tho thutin "Restroom-ah ka kal lawk dawn" tiin dan hman lohin a kal nghal nal nal. Bethsyi chu ka mitmei zeuh a. Ani pawh a tho ve nghal vat. "Eng nge thleng a?" Hriatpuia chuan a rawn ti a. "inhriat ve zel a ṭul em ni?" ka lo ti a. A khi sak. "A ṭul a nih ka ring e a." a ti a. Ka ngei lutuk. Chhang zui lo-in tukverh lam chu ka hawi a, ral leh lama tlang hring dup chu ka thlir mai mai a. 

Nun hi a hahthlak an ti, keichuan a hahthlak na vak ka hre ve lo. Mahse khawvel kan awmchin a tam zel a, kan kumbih chin a tam ang zelin tawnhriat pawh kan nei ve zel. A hma chuan keichuan lungngaihna te, sum leh pai thawh chhuah hahthlak zia te hi a awmzia ka hre lo. Ka duh chu ka nu leh pa te bulah ka sawi a, an ni'n min pe mai ṭhin. Mahse Ruthi te ang tan hi chuan chutiang chu a ni ve lo. An school leh college kalna tur pawh thawhchhuah zel an ngai. An rilru a hah thei ngawt ang. Nun beidawnna awmzia hi ka hrethiam lo a, nun khawhar awmzia lah ka hre hek lo. Pa neih loh hreawm zia leh hahthlak zia ka hrethiam lova, nu tel lo a seilen harsat tur zia lah ka hrethiam hek lo. Nu leh pa min uap lumtu tur leh min zilh tu tur ka la nei a. Mahse chuti chung chuan Pathian hnenah hian ka lo la vui ve ṭhin a ni sia. 

Ka dara min sawi nawk nawk tu vang chuan ka ngaihtuahna aṭang ka harh zawk. Ka ṭhiante lam chu ka hawiphei a, anni lah chuan nuih insum tih hriat zetin an hmui an pet fan fan mai. Ka dara min rawn sawitu ka en chuan ka ner sawk. Remsanga lek!

"Eng nge i duh?" ka ti ram hmak a. "Ka zawhna che kha min chhang la" hahdam hmel zetin a lo ti si. "Ka chhang peih lo che" ka ti ve ringawt a. Ka ṭhiante an lo nui phuh ṭhawt."Eng nge?" ka ti vin hlar tawh mai. Anni lah chu an nui char char a. Remsanga lam ka en lah chuan nuihza insum hmel ka hmu, Remsanga ṭhiante ka en leh chuan an lo nui dir char char a. Eng nge awmzia?

Ka ding hluai a, rang zetin min pawt ṭhu leh nghal. Ka rak ṭhawt a, "Eng nge i hriat a?" ka ti hlar mai. "Ninawm sawi tum leh chuang si lo. Mi â angin min hawi hu hu tir intum mi?" tihpahin ka bag chu ka la a, ka chhuak nghal nal nal. Min umzui em pawh ka hre lo, mahse Tetein min ko ri erawh ka hria. Corridor-ah chuan Ruthi te nen kan intawk a, a mit chu a bui lak mai. A ṭap a ni ngei ang. Min hmuh chuan mak ti hmel an pu an bulah chuan ka ding dat a. "Ruthi i ṭha tiraw?" ka tihchuan a bu nghat. Engmah sawi tawh lo in ka kalsan leh a, ka scooty park na ka thlen chuan thawk ka la hawk a.

Ka hnunglam aṭanga Hlutei min ko ri ka hriat chuan ka scooty ka start vat. Eng a ti nge pawh ka hre lo, ka hmu hreh deuh tlat. Scooty chu start-in hmun nuam deuh lam pan tumin ka tlanchhuak nghal. A hmaa ka lo hriat tawh hmun chu ka pan nghal a. Ka tlan chak bawk a, Aizawl khaw chhung pawh ka pel thui tawh viauin ka hria, ka hnunglamah chuan min rawn umzui zel tih ka hre mai. Ka tlan chak sauh a. Huan pakhat ka tlan pel chuan peng awmah chuan ka peng zeuh a. Min hmuh hman loh hram ka beisei. Ka tlan zawm char char a, mual nuam deuh phul hmunah ka chhuak ta a. Thli a lo thaw heuh heuh a, a nuam takzet. Ka scooty chu park ṭha-in thingkung lam chu ka pan a, sava thawm bak eng thawm dang mah a awm lo. Ka scooty lam chu ka hawi a,ka hnunglam a hnah thel ro tla khawm chu a rawn ri hrut a. Ka lehhawi vat, mahse engmah ka hmu lo. Ngaihṭhat lohna pawh nei lem lo-in ka scooty mitsir thei zawngin ka ding leh vang vang.

Ka scooty dahna lam chu ka pan nghal a. Scooty dahna bul ka thlen chuan Remsanga bike a rawn tlan thleng ve chiah, ka la phu uih zui. "Eng nge heti lai thleng thlenga min umzui?" ka ti a, ka melh ram ram bawk. Mahse a hmel awmdan ka hre ve thei chuang lo, a chhan pawh helmet full face a khum vang a ni.

Ka scooty chu start ṭha-in tlan leh mai ka tum a, mahse eng ati tehreng nge mawni nichina hnahthel ro awmna lam kha ka hawi phei vut a, ka thil hmuh vang chuan ka meng phawk teh e! Rei lo te chhung chu ka hamhaih a, mahse kan lam pana a rawn tleng phei tak zul zulah chuan harh chhuak thutin ka scooty chu ka start nghal sawk sawk a. Chahbi lah chu ka la rawlh lut fuh thei lo zui. "Hmanhmawhin tlan rawh" Remsanga chuan a rawn ti tuar a. Keipawh ka scooty start-in chak mangkheng in ka tlanchhuak nghal. Kawngpui kan pawh leh chuan Hlutei te ho chuan min lo en ṭhap a, ka thaw hlawp hlawp mai. "Nui i ṭha em?" Hlutei chuan mak tih hmel takin a rawn ti a, ka lu a lo bu nghat ringawt. Muantea chuan "Khaw nge Remsanga?" a rawn ti a, ka harh zawk. Ka hnunglam chu ka hawi a. A lo tlan ve reng reng lo.

"Khaw nge Remsanga ka tih chu?" a rawn ti leh ṭhawt a. "K... a ka hre lo.. a lo tlan ve turah ka ngai a" ka tih bah nuai a, chutia hlauthawng taka kan awm lai chuan Remsanga chu a rawn lang ve hlawl. Ka thaw huai mai. Kan bulah chuan a rawn ding a. "Ava hlauhawm ther ther ve.. khati laiah khan vawikhat mah kal tawh suh ang che" tiin min rawn en a. A helmet a la thla tawh. Ka lo bu nghat. "Kha huan neitu te kha hrilh hriat vat an ngai ang" a ti a. "Tu te huan nge i hria em ni?" ka lo ti hâw a, a nui suk. A bu nghat a. Awi! Ṭhiannu a nui hmel kha hmu ve la ka va ti si êm. A ṭha thlawt.. A pa ngawih ngawih. Mahse inthing harh vatin. "Ni e, hrilh rawh la bo daih rawh se, a nih loh pawh in that daih rawh se. Nakinah keimahni kher lo pawh midang te reu reu pawh ala dawlh ang" ka ti a. Ka ṭhiante chuan mak ti fe-in min melh tawn zak zak. 

"Haw ang u, class kan bunk ringawt sia, ka ril a ṭam ania" ka ti a, ka tlan zui nghal. Anni pawh chuan min rawn zui ve zel. Restaurant pakhat kawtah chuan ka ding dat a. Anni pawh an rawn ding ve nghal. "Thil ei lawk in duh em?" tiin ka zawt hlawm a. Tunah 1:25 a ni a, rilṭam loh a hun tawh lo. "Keichuan pawi ka ti lo nasa, ka rilṭam tawh zia chu" Tetei chuan a rawn ti nghal a. "I pawi tih leh tih loh a zawt che mi?" Muantea chuan a lo ti khauh. "Min zawt ka ti mi?" awi! inhnial chu a peihawm rih lo em mai. "Inhnial lo teh u,ei ang u ka ril aṭam" ka ti a, ka lut zui nghal. Anni ho paw'n min rawn zui ve mai. Mi chuan min lo enduh viau a, eng nge maw an hriat a, min en hu hu hlawm le. Ee! taka Remsangzuala a awm ve tak e. Nula lo awm ho chuan an enduh lehzual. Ṭhutna awl lam chu kan pan nghal a. Waiter chuan min rawn pan nghal vat. Kan duhte kan sawi chu a ziak mawlh mawlh a. Remsanga chu a melh zeuh zeuh tih pawh ka hria. 

Kan eitur chah a rawn thlen chuan kan ei nghal mial mial a. Hlutei thil ei chu Khawngaihtea chuan a melh leh vung vung zel. Hlutei lahin a thil ei a ṭhulh phah duh der lo. Mahse a lai hle tih hriat takin a biang chu a tai tek tawh. A tawp atawpah chuan "Lalropui min en reng suh" a rawn ti ta nge nge a. Khawngaihtea a nui hawk. Engmah sawi chuang lo in hmundang a hawisan a ve leh mai bawk. 

Tetei te erawh an lo inhnial leh tawh. "I tet tet nen i eithei phian" Muantea chuan a lo ti pek a. "I buaina tur a awm mi?" Tetein a lo ti ve thung. Awi! an inhnial zui char char. Ka lo hne. Kan eizo tawh bawka, kan eiman pe turin ka tho chhuak ta daih a. Ka hnungah chuan Remsanga a rawn tho ve nghal. Eiman vel kan pek lai chuan pawisa lo dawngtu nu thau ve deuh, mahse ngo vung leh hmelṭha tak si chuan "In inhmeh hle mai" a lo ti a. Ka bo hû mai. "Ka pi eng nge i sawi awmzia?" ka ti a. Pawisa chu min kir pahin "In ngaizawng tur diktak in niang, in inhmeh khawp mai" a ti a. Chhan pawh ka chhang peih lo. Ka nui tawp. Ka ṭhiante lah chuan an lo hre ve hman pek aniang chu, min chhaih zui reng lehnghal. Remsanga lah chuan eng atan mah a ngaih hmel si loh a. Ka ninzia hi.

In ka thlen chuan ka nu a lo awm a, min lo melh no tehchiam lo khawp mai. "Eng nge?" ka ti a. "Class i bunk elo?" a lo ti a. Ehe! engtin nge a hriat le. "Bunk lo" ka lo ti thung. "Dawt sawi suh Ramnghinglo in principal ngeiin min rawn bia a, i rawn haw leh haw loh min zawt asin. Eng buaina nge i siam leh tak le?" beidawn hmel zetin a ti a. "Lo hre lo der hmak rawh," tiin ka room lam panin ka chho nghal a. "Ding nghal rawh,hetiang tur hian ka fanu hi ka enkawl che em ni?Khawilaiah khan nge ka enkawl dan dik lo che a, heti fakaua mi namnul mai le" a ti a. A aw-ah chuan rilru natna a tel tlat! Chhuk lehin ka pan thla a, "Nu i thiamloh engmah a awm lo,keima dik loh zar vek zawk a ni" ka ti a. Ka nu chu ka kuah a. "Nu i thusawi te hi hnialin zawm lo ṭhin mah ila maw, ka hmangaih tho che a nia. Ka hmangaih ber che" ka ti a. Ka hnunglam aṭang "I pa hi min hmangaih ve dawn lo amaw?" ka pa chuan a rawn ti a. Ka nui hak. "Ka hmangaih ber ve ve cheu" ka ti a. Ka inkuah khawm ta a.

A tuk a nih chuan phur sarhin class kan thleng a, ka mood hi a dik vel vek. Classroom kan luh a, kan ṭhut hnu lawkah Chhe lo te-a te pawh an lo thleng a. Muantea chuan Tetei a hmuh rual rualin "Ehe! i sam chu i va chhe chhep chhup ve" a ti a. Tetei lah chuan "Ka ṭha chhep chhup" "Chhep chhup lo" "Ṭha min ti lutuk a, min fak dan tur i hre lo mai mai nih kha" awi! ka hne e... Anni pahnih awmdun hi chu ui leh kêl thlun pawlh ang vel an ni.

Class pawh a nuam leh viau e. Mahse ka mutthluk sak chiang teh e. Ka bulah hian Hlutei a ṭhu ṭhin kha a nia, mahse Hlutei chu Khawngaihtea bulah a ṭhu daih a, Remsangzuala ka bulah a ṭhu a. Ani pawh hi mutthluk emaw class lak laia thil dang ngaihtuah daih hi a professional na lam emaw tih tur hi a nia. Kan tlar hi chuan eng note mah kan nei ngai lo, kei hi zan ka mut hma changin note ka nei a a ni mai. Chuti a nih loh chuan Hlutei note ka dil ṭhin.

Zanah chuan group-ah kan rak vel mai mai a. Chaw eilaiin nimina class ka bunk chhan ka pa'n min zawt a. Ka hrilh vek a, engtin mah min hau lo. Kan ṭhianho pawh Ruthi tih loh kan kim ṭheh ṭhawh e. Ruthi chu lehkha a zir anih kan ring a, engmah chu lo sawi chuang miah lo mahse ani hi chu mi taima ngang a nia. Kan hrethiam. Kan tibuai ngai lem lo.

Zing ka thawh thleng pawh chuan Ruthi chuan eng message mah a lo hnutchhiah lo, mahse class pana kan tlan laiin Sawmtein min rawn call a, Hlutei chuan a lo chhang a, a hmel dang sawp sawp aṭang chuan thil ṭha lam a ni lo tih ka hre nghal. Kawng sirah chuan ka scooty chu ka park a. "Nui hostel lamah tlan rawh" a ti a. "Ti nge?" ka tih chuan. "Ih thleng phawt ang" a ti a. Keipawh chuan zawt zui lem lovin ka tlan ve nghal. Hostel kan va thlen chuan Ruthi room lam kan pan nghal a. Tetei te ka hmuh chuan thil awmzia ka zawt nghal a. "Kan hre bik lo, mahse hei hi en teh u" tiin a phone chu a rawn lek kang nghal a. Ruthi hmel chu chiang takin a lang a. Mipa erawh a hriat theih loh, mipa chuan a suasam ti mai ang, chutiang bak chuan ka sawithiam lo. Ruthi chuan nikhua a hre lo a ang, ngawi teh ni lo a hre leh si, mahse dang turin tha a nei miah lo a ang.

Room kawngka chu ka kik a, engmah kan hre lo. Remsanga te an rawn thleng ve a. Eng nge hetah anni hian an rawn tih ve, mahse chutiang ngaihtuah hman ka ni lo. Hriatpuia hmel chu a dur khup mai, midang te hmelah erawh engmah a lang lo. Room kawngka chu an kik ve a, awmzia ala awm chuang lo. An tichhe ta ngawt a. A room kan luh chuan kan hmu lo, bathroom chu ka va en a, ka ṭe ṭhawt. Ruthi chu aban veilam thi chungin bathroom-ah chuan a lo ṭhu sawp nuai mai. Hriatpuia chuan a pawm vata. Damdawi in kan pan pui nghal. Hetianga titu hi tu nge ni ang. Ka hriat hun chuan a sam ka pawh kawlh sak chiang khawp ang.

(Tlaiah ka muhil daih a, engmah ka type leh chuang si lo a. Inbual zawh ṭang ka type a, ka kut a khawng titih lehnghal. Inchan tawkah hian lo lungawi phawt teh u. 😂🤣)